Proclamation 1699 Waray language version

PGMA nagpagawas han skedyul han mga pyesta opisyal para tuig 2009 pinaagi han Prroklamasyon 1699

Hi Presidente Gloria Macapagal-Arroyo in nagpirma dida han Disyembre 24, 2008, han Proklamasyon 1699 kun diin ginpahamtang an mga pyesta opisyal para yana nga tuig.

Ini nga pagproklamar in kanan Presidente hingyap pagpakurokusog hit turismo ha aton dapit ngan paghatag hit mga Pilipino hin darudako nga oras para hit ira tagsa-tagsa nga pamilya, salit nagkaada hin napulo kahalaba nga mga pyesta opisyal yana nga 2009.

An rason pagbalhin han adlaw han pira nga mga pyista opisyal ngadto ha Lunis o Byernis in para makagpahalipay an mga Pilipino hin hiruhilaba nga bakasyon.

Nagpasabot an Malacanang nga antis ini pagdisisyunan nga lista han mga pyesta opisyal nga mga adlaw, nagkaada anay hin kunsultasyon tikang ha iba-iba nga sektor kaupod an mga negosyante.

An una hini amo an tulo kaadlaw antes han Semana Santa, an pag-obserbar han Araw ng Kagitingan ha Abril 9, Hwebes, nga gindus-ug ngadto han pinakahirani nga Lunis nga amo an Abril 6.

Ginsusundan ini han upat ka-adlaw nga pag-obserbar han Semana Santa nga matikang ha Abril 9 nga amo an Maundy Thursday, tubtub ha Abril 12 nga amo liwat an Easter Sunday.

Upat nga regular nga pyesta opisyal in nahitutuman hin Byernis o Lunis ngan naresulta ini hin tulo ka-adlaw nga waray trabaho kun ig-uupod it Sabado ngan Domingo.
Ini nga mga pyesta opisyal amo an
Araw ng Manggagawa ha Mayo 1 nga nangada ha Byernis;
Araw ng Kalayaan ha Hunyo 12 nga nangada hin Byernis;
Araw ng Mga Bayani ha Agusto 31 nga nahangada ha Lunis; ngan an
Bonifacio Day ha Nobyembre 30, Lunes nga adlaw.

An iba pa nga mga pyesta opisyal amo an
Pasko ha Disyembre 25 nga nahingada hin Byernis, ngan an
Rizal Day ha Disyembre 30 na nangada ha Myerkoles nga adlaw.

An iba pa nga mga adlaw nga gindeklarar han Presidente nga Special Non-Working Days amo an:
Ninoy Aquino Day ha Agusto 21 nga ada ha Byernis;
Adlaw han mga Santo ha Nobyembre 1 nga nangada ha Domingo; ngan an
Adlaw han mga Kalag dida ha Nobyembre 2 nga nangada ha Lunis.

An gab-I han Pasko ha Disyembre 24 nga nangada ha Huebes, in gindeklarar gihapon nga Special Non-Working Day yana nga tuig.

Usa pa nga Special Non-Working Day amo an gab-i han bag-o nga tuig hit Disyembre 31 nga nangada ha Huebes nga adlaw.

Pagsilibrar hit Pasko yana nga 2009 haruhalaba it bakasyon kun diin matikang ini ha Disyembre 24, gab-i hit Pasko.