Malipayong Pasko Kanatong Tanan

Excerpts from Ruphil Banoc of Birada,dyHP Cebu
December 23,2008



ANG gidaghanon sa mga tawo nga buot mouli sa tagsatagsa nila ka pamilya ug probinsya atol sa Pasko ug Bag-ong Tuig nagpakita nga way gahom sa krisis nga mopatay sa Krisyanong tradisyon pagsaulog niini.

Mobalik ta sa atong mga pamilya, ang atong bugtong kadaganan sa mga higayon diin sirado na ang pultahan sa uban, ang miumol sa atong mga damgo. Mobalik ta sa atong probinsya — ang yuta diin natawo ang una tang gugma nga ispisyal, diin makita ang punoan sa bayabas nga ato gikatkatan human sa pamuhi sa klasi, ang sapa diin kita nangaligo bisan usahay way sabon. Oo, ang yuta nga atong gimahal. Hangtod nga kinahanglan ato kining biyaan tungod sa tukmod sa pagpanimpad o pagpangita sa mga oportunidad ubos sa adlaw. There is no place like home.

Ang Pasko makapahinumdom kanato sa mga adlaw sa atong pagkabata, diin ang pagpasaylo dali ra kaayo natong mahatag, diin dali ra kaayo tang malipay bisan sa mga gagmayng butang. Hangtod nga ang kahakog mipuli uban sa atong paghamtong.

Ang Pasko mahitungod sa pagminahalay ug pagpinasayloay. Lisod kini himuon kung mismo sa atong kaugalingon di nato mahatag ang maong pagmahal ug pasaylo. Pasayluon ta ang atong mga kaugalingon tungod sa atong kapakyas paglimot sa mga butang nga angayang kalimtan og paghambin ug kasilag ngadto sa uban.

Mahalon ta ang atong kaugalingon pinaagi sa paghatag niini og gasa sa respeto ug prinsipyo nga di mapalit. Kung ang pakig-uli (to reconcile) maoy usa sa mga dugokan sa Pasko dan alang kanako ang pakig-uli sa kaugalingon (reconciling with oneself) maoy kinahanglang mag-una sa listahan.

Atol sa Pasko daghan ang mopahigayon og class o ba kaha family reunion. Mga classmates sa high school o college mosubay pagbalik sa aping-aping sa lapyahan sa kagahapon - sama sa mga kagahapon nga naputol ug di na mahimong sumpayan pa hilabi na gyud niadtong mga naminyo na.

Tinuyo man o di, ang reunion higayon usab alang sa uban aron ipanghambog ang ilang nakab-ot sa kinabuhi. Ug sagad sukdon kini sa gidak-on sa panimalay, sa kaanindot sa sakyanan, kalapad sa koneksyon – materyal! Sila nga mga nagpasakit alang sa uban - mga naglihok sa mga non-government organization (NGOs) o sa mga boluntaryong organisasyon, mga yanong magtutudlo ug uban pa hatagan na lang og kumplimento. Ang mga dagkong kawatan nga pulitiko dinayeg sa pundok ug gipakpakan.

Alang kanako ang reunion mao ang paghisgot sa mga maayong butang ug pagpalig-on sa relasyon ug wa nay lain pa.

Malipayong Pasko kanatong tanan. Hinaot nga ang balaang gugma nga gipakamatyan ni Kristo didto sa krus maghari sa atong tagsatagsa ka mga kasingkasing.